Sabiex jitfakkar il- 75 anniversarju mit-twaqqif tal-Parroċċa  San Sebastjan fl-1936 il-Kappillan għadu kif waqqaf Kumitat Organizzattiv.  L-għan ewlieni hu li bħala kommunità nisranija nfakkru dan l-anniversarju bl-aktar mod xieraq sabiex iħalli impatt posittiv fuq il-ħajja u tal-valuri tagħna lkoll. 

Dan il-kumitat hu magħmul minn dawn il-persuni:

  Rev Joseph Buhagiar, Kapillan;

  Rev Reuben Gauci, viċi kappillan;

  Vince Peresso, ċermen;

  Charles Saliba, segretarju;

  Elaine Schembri, PRO;

  Mary C. Agius u Alex Powell, membri.

It-tema magħżula għal din it-tifkira hu l-ewwel vers tas-salm 122

FRAĦT META QALULI:

“SEJRIN F’DAR IL-MULEJ”.

Hekk qegħdin mhux biss nifirħu imma ukoll, anzi fuq kollox, ninkwardaw dan il-ferħ tagħna f’ħdan il-Mulej fl-għożża li insibu fid-dar.

Iż-żmien ta’ dan l-Anniversarju hu mill-1 ta’ Jannar sal-31 ta’ Diċembru 2011.  Id-dati partikolari  li se jfakkru dan l-anniversarju huma dawn:

• 25 ta’ Ottubru 2010, il-75 sena mid-digriet tat-twaqqif tal-parroċċa
• 5 ta’ Jannar 2011, il-75 sena mill-pussess tal-ewwel Kappillan
• 19 ta’ Jannar 2011, tifkira tal-konsagrazzjoni tal-knisja
• 20 ta’ Jannar 2011, tifkira liturġika tal-Martirju ta’ San Sebastjan
• 11 sa 18 Lulju 2011, festa San Sebastjan.

Barra minn dawn għandhom jiġu magħżula dati oħra mifruxa matul is-sena kollha fejn isiru attivitajiet biex infakkru dan l-anniversarju.

Hu l-ħsieb li l-kummissjonijiet parrokkjali, l-għaqdiet (sew reliġjużi kif ukoll ċiviċi) u gruppi oħra fil-parroċċa jiġu mistiedna sabiex flimkien bħala kommunita nisranija jikkontribwixxu b’xi attivita matul is-sena 2011.  Għalhekk aktar ‘il quddiem il-kumitat organizzattiv se jsejjaħ laqgħa għal dawn kollha sabiex niddiskutu u nippjanaw il-ħidma għal matul din is-sena tal-anniversarju.

Il-Kumitat Organizzattiv diġa ħareġ b’xi ideat bħal:

• -ħidma formattiva dwar il-knisja sew lokali kif ukoll universali,
  
• -kullana ta’ talb,
  
• -katekeżi dwar il-parroċċa u l-knisja,
  
• -tisħiħ tal-ħajja nisranija permezz tal-Ewkaristija,
  
• -aktar sens ta’ djakonija u sapport  lil min hu fil-bżonn.
  

Liema ideat iridu jissawru u jitlaħmu f’attività u ħidma konkreta.  Naturalment ma jonqosx ukoll l-aspett ċelebrattiv fil-festi li niċċelebraw matul is-sena.  Hemm ukoll il-ħsieb li jittellew wirjiet ta’ ritratti dwar il-parroċċa matul iż-żmien li ukoll jistgħu jinġabru fi ktieb.  Dwar dan napprezzaw li min għandu xi ritratt dwar il-parroċċa jikkuntattjana ħalli nkunu nistgħu nagħmlu kopja tiegħu.

Għal dan il-għan qed nitolbu l-għajnuna mhux biss tal-għaqdiet fil-parroċċa imma ukoll ta’ individwi għal suġġerimenti, ideat u kull għajnuna oħra, mimlija tama li kulħadd għandu post fid-Dar tal-Mulej.